Ráðherra vill ekki loka háskólum

Katrín Jakobsdóttir menntamálaráðherra segir að þótt samvinna og sérhæfing háskólanna verði höfð að leiðarljósi sé ekki þar með sagt að það eigi að leggja niður heilu háskólana. Félag prófessora við ríkisháskóla leggur til við rektor Háskóla Íslands að stjórnvöldum verði gert tilboð um að taka við öllum nemendum Háskólans í Reykjavík.

„Við erum náttúrlega bara að vinna samkvæmt ákveðnu plani hér í ráðuneytinu," segir Katrín. Hún telji að það beri að einblína á samstarf skóla og aukna verkaskiptingu. „Við þurfum að endurmeta hvort við höfum efni á því að borga fyrir kennslu á fjórum stöðum. Það þarf því að setja fram ákveðna forgangsröðun við þessi fjárlög núna. Þar með er ekki sagt að við sjáum fram á það að loka háskólum," segir Katrín. Hún segir að margir af þeim háskólum sem nú starfi séu að vinna mjög gott starf. Hún leggur áherslu á að horft sé á málin út frá fræðasviðum og reynt að varðveita gæði kennslu og náms á þeim. Þetta þýði að skólar verði að draga úr starfsemi á einhverjum sviðum en geti varðveitt annað.

Aðspurð um þróun háskólanáms á síðustu tíu árum segir hún að hér hafi verið opið kerfi sem hafi haft í för með sér mikla grósku en lítið skipulag. Þetta þýði að sumar greinar hafi verið á stöðugu undanhaldi á öllum góðæristímanum á meðan aðrar séu kenndar á fjórum eða fimm stöðum. Til dæmis hafi hugvísindafögin orðið útundan. „Þau hafa ekki verið í eins mikilli samkeppni og ýmis önnur fög," segir Katrín.