Blóðtaka ef HÍ tæki námið í HR yfir

Ari Kristinn Jónsson, rektor Háskólans í Reykjavík, segir að full þörf sé á því að skólinn sé starfræktur áfram. Hann er því ósammála félagi prófessora við ríkisháskóla sem leggur til við rektor Háskóla Íslands að stjórnvöldum verði gert tilboð um að taka við öllum nemendum Háskólans í Reykjavík, samkvæmt frétt Fréttablaðsins.

„Það er skiljanlegt að félag prófessora við ríkisháskóla setji fram þessa tillögu til að vernda sín störf en við verðum að horfa á miklu breiðari hagsmuni og í mínum huga væri það miklu betra að háskólafólk landsins sneri bökum saman til þess að vernda háskólamenntun," segir Ari. Hann segir að Íslendingar standi nágrannaþjóðunum langt að baki við fjármögnun háskólanáms. „Við erum með helmingi lægri upphæð á nemanda en Noregur til dæmis," segir Ari.

Ari segir að ef fögin yrðu sameinuð í einum skóla myndi tapast það sem áunnist hafi í því að vera með þessi fög bæði í HR og HÍ. „Rannsóknir á tæknisviðum hafa til dæmis meira en tvöfaldast síðustu tíu árin og mikið áunnist," segir Ari. Hann bendir jafnframt á að Háskólinn í Reykjavík útskrifar 2/3 af háskólamenntuðu fólki í tæknifögum og helming af háskólamenntuðu fólki í viðskiptum. „Þannig að þetta er engin smá blóðtaka fyrir viðskiptalífið og atvinnulífið að missa þetta. Og það er mikil þörf á þessu fólki til framtíðar," segir Ari.

Þá segir Ari að Félag prófessora í ríkisháskólum horfi ekkert til þeirrar rannsóknarstarfsemi sem fari fram í HR. „Þar er staðreyndin sú að HR stendur jafnfætis HÍ á þessum sviðum, í tækni viðskiptum og lögum - á mörgum sviðum reyndar framar," segir Ari. Hann bætir því við að enn sé mikil uppbygging í gangi og að það gæti orðið gríðarlegur skaði fyrir nýsköpun á Íslandi að leggja þetta starf af.

Ari fullyrðir að kostnaður ríkisins við útskrifaða nemendur og kostnaður við rannsóknir sé minni í HR en í HÍ. „Ef það ætti að sameina þessi fög á einum stað, viðskipti, tækni og lög, að þá væri ef til vill fjárhagslega hagkvæmara að færa þau til HR," segir Ari. Hann telji þó að helst ætti ekki að fara leið sameiningar.