Einhleypar konur og samkynhneigð pör geta fengið egg og sæði

Einhleypum konum og samkynhneigðum jafnt sem gagnkynhneigðum pörum, sem búa við skerta frjósemi beggja maka, er nú heimilt að nota bæði gjafaegg og gjafasæði við glasafrjóvgun. Lög þess efnis voru samþykkt á Alþingi í gær.

Með lögum sem samþykkt voru frá Alþingi í gær er einhleypum konum og pörum sem búa við skerta frjósemi beggja maka heimilt að nota bæði gjafaegg og gjafasæði við glasafrjóvgun. Á það við um jafnt gagnkynhneigð sem samkynhneigð pör. Að óbreyttum lögum hefði eingöngu verið heimilt að nota gjafaeggfrumu við glasafrjóvgun ef sæðið hefði komið frá verðandi föður. Það var því óheimilt að nota gjafaegg við glasafrjóvgun einhleyprar konu, konu í sambúð með annarri konu eða konu þar sem ekki var unnt að nota sæði frá eiginmanni eða sambýlismanni.

Með nýju lögunum, sem samþykkt voru með öllum greiddum atkvæðum í þinginu í gær, hefur þó verið gerð bragarbót á. Samkvæmt frumvarpinu er gert ráð fyrir að þær konur sem þurfa á bæði gjafaeggi og gjafasæði að halda við glasafrjóvgun séu einkum einhleypar konur á seinni hluta frjósemisskeiðsins og einhleypar konur sem búa við skerta frjósemi, svo sem vegna krabbameinsmeðferðar. Í frumvarpinu er tekið fram að ekki verði séð að það hafi í för með sér aukin útgjöld fyrir ríkissjóð.

Þuríður Bachman, formaður heilbrigðisnefndar Alþingis, segir að með lögunum sé verið að gæta jafnræðis meðal kvenna, hvort sem þær eru í gagnkynhneigðri sambúð, samkynhneigðri eða einhleypar, rétt eins og á öðrum sviðum þjóðlífs. Hún bendir jafnframt á að breytingarnar gefi tilefni til að fara í umræðu um rétt barna til að þekkja kynforeldri sitt og segir heilbrigðisnefnd munu stuðla að því að sú umræða verði tekin.