Bjartsýn á icesave-samkomulag í kvöld

Jóhanna Sigurðardóttir, forsætisráðherra, telur líklegt að nýtt samkomulag náist í Icesave deilunni við Breta og Hollendinga í kvöld. Hins vegar bendi allt til þess að þjóðaratkvæðagreiðslan fari fram á tilsettum tíma.

Ríkisstjórnin bindur enn vonir við það að hægt verði að ná nýju samkomulagi við Breta og Hollendinga í Icesave málinu áður en boðuð þjóðaratkvæðagreiðsla fer fram.

Samninganefnd Íslands hefur setið á fundi með Bretum í allan dag og eftir því sem fréttastofa kemst næst var fundi enn ólokið nú skömmu fyrir fréttir.

Jóhanna Sigurðardóttir, forsætisráðherra, var hins vegar nokkuð vongóð þegar fréttamenn náði tali af henni fyrir þingflokksfund samfylkingarinnar nú síðdegis.

„Við höfum verið að reyna að ná fram lægri greiðslubyrði og það er það sem menn eru að vinna með núna. Við skulum sjá hvað kemur út úr því. Það mun skýrast á næstu klukkutímum," segir Jóhanna.

Spurð hvort það komi til greina að fresta þjóðaratkvæðagreiðslu náist samkomulag í dag eða kvöld svarar Jóhanna að hún eigi síður von á því.

„Við munum auðvitað skoða málið ef við fáum tilboð. Og ef það er ásættanlegt þá er hugsanlegt að leggja fram frumvarp um þann samning en ég hef ekki trú á því að við náum að afgreiða hann," segir Jóhanna.

Stjórnarandstaðan vill alls ekki að fallið verði frá þjóðaratkvæðagreiðslu, jafnvel þó að Bretar og Hollendingar leggi fram ásættanlegt tilboð.