Segir tómarúm á stóru svæði innan Sjálfstæðisflokksins

Þorsteinn Pálsson segir að ákveðið tómarúm sé á stóru svæði í Sjálfstæðisflokknum meðal þeirra sem fylgja ESB-málinu. Hann segist sannfærður um að Sjálfstæðisflokkurinn muni virkja þetta afl. Hann útilokar endurkomu í stjórnmál.

„Það er afar óhollt að endurskoða söguna fyrir sjálfan sig," segir Þorsteinn Pálsson, fyrrverandi forsætisráðherra, sendiherra og ritstjóri. Jón Baldvin Hannibalsson og Steingrímur Hermannsson og Þorsteinn sjálfur gerðu allir kröfu um að verða forsætisráðherrar fyrir stjórnarmyndunina 1987, segir Þorsteinn en hann gerði upp árin sín í stjórnmálum í Sprengisandi, þætti Sigurjóns M. Egilssonar á Bylgjunni í morgun. Þorsteinn sagði að ágreiningur um málefni hafi á endanum endað ríkisstjórnarsamstarfið, en því lauk í beinni útsendingu á Stöð 2. Og er útsendingin því um margt söguleg. Þorsteinn sagði við Sigurjón í morgun að efnislega hafi samstarfið verið búið töluvert fyrir þetta sjónvarpsviðtalið þar sem leiðtogarnir þrír fóru yfir málin.

Átti ærleg samtöl við Albert Guðmundsson

Þorsteinn fór lengra aftur í þættinum og sagði að hann hefði átt ærleg samtöl við Albert Guðmundsson, sem hann bað um að segja af sér í aðdraganda alþingiskosninganna 1987, en sumir stjórnmálaskýrendur hafa talið þennan atburð vörðu á vegferð Þorsteins út úr stjórnmálum. Hægt er að hlusta á viðtalið við Þorstein á vef Vísis og Bylgjunnar.

„Af því að maður var ungur þá var maður meira tilbúinn að leggja áherslu á málefnin en stólana," sagði Þorsteinn, sem segir það hafa verið hollt að vera málefnalegur.

Þorsteinn fór yfir Viðeyjarstjórnina 1991 þegar honum var boðið að velja sér ráðherrastól eftir að hafa tapað í formannskjöri á landsfundi fyrir Davíð Oddssyni. Þorsteinn fór einnig yfir störf sín sem sendiherra og sagði að hann hefði lært mikið á því að vera sendiherra í Lundúnum, sérstaklega því að vera nálægt breskum stjórnmálum.

Þorsteinn sagði við Sigurjón að ákveðið tómaróm væri á hægri vængnum í íslenskum stjórnmálum og vísaði þar til áhuga margra sjálfstæðismanna sem vilja klára samningsferlið við ESB og leggja niðurstöðuna í dóm þjóðarinnar en ályktun landsfundar flokksins var á þá lund að draga ætti aðildarumsóknina til baka. Þorsteinn sagðist samt ekki efast um að Sjálfstæðisflokkurinn myndi stíga skrefið og styðja við samningsferlið. Aðspurður sagðist hann útiloka endurkomu í stjórnmál. thorbjorn@stod2.is