Þrisvar verið beint leysigeisla á flugvélar á þessu ári

Afar auðvelt er að nálgast öfluga leysibenda hér á landi en slíkur búnaður getur valdið varanlegum augnskaða og jafnvel kveikt í hlutum úr fjarlægð. Þrisvar hefur leisergeisla verið beint að stjórnklefa flugvélar á vegum Icelandair á þessu ári en slíkt getur valdið mikilli hættu. Þá hlaut kennari augnskaða fyrr í þessari viku þegar nemandi beindi slíkum geisla að honum.

Mikil hætta skapaðist þegar leisergeisla var beint að stjórnklefa Fokker flugvélar frá Flugfélagi Íslands þegar hún var í aðflugi að Akureyrarflugvelli á þriðjudag. Fjórtán ára piltur játaði síðan verknaðinn.

Geislarnir koma úr svokölluðum leysibendum en þeim er skipt í fjóra styrkleikaflokka. Fyrstu tveir eru ekki hættulegir og almennt notaðir við kennslu hér á landi.

„Leysibendar í flokki þrjú geta skaðað augu. Með leysibenda í flokki fjögur getur þú kveikt í hlutum úr fjarlægð," segir Þorgeir Sigurðsson fagstjóri hjá Geislavörnum ríkisins.

Auðvelt er að nálgast öfluga leysibenda í verslunum hér á landi og þá er einnig auðvelt að kaupa þá á netinu. Geislavarnastofnanir í Finnlandi, Íslandi, Noregi og Svíþjóð hafa sent formlegt bréf til framkvæmdastjórnar Evrópusambandsins þar sem hvatt er til innflutningstakmarkana og banns á almennri notkun öflugra leysibenda.

„Við viljum helst ekki að þetta verði þannig vandamál að einhverjir verði blindir eða einhverjir blindist sem stjórna farartækjum þannig að þeir valdi slysum. Þetta gæti orðið mjög stórt vandamál," segir Þorgeir.

Samkvæmt upplýsingum frá Icelandair hefur það þrisvar gerst á þessu ári að leisergeisla hafi verið beint að stjórnklefa flugvélar á vegum félagsins. Tvisvar við flugvöll í Evrópu og einu sinni hér á landi - í sumar - þegar flugvél var í aðflugi að Keflavíkurflugvelli. Það mál var hins vegar ekki kært til lögreglunnar. Leisergeislinn blindar flugmenn og getur skapað mikla hættu.

Þá hefur fréttastofa heimildir fyrir því að fyrr í þessari viku hafi kennari hér á landi hafi skaðast á auga þegar nemandi beindi öflugum lasergeisla að honum.