Hækkanir framundan í Reykjavík

Álögur á venjulega fjögurra manna fjölskyldu í Reykjavík gætu hækkað um 75 og upp í 450 þúsund á ári hækki gjöld og skattar í höfuðborginni til samræmis við það sem tíðkast í sumum nágrannasveitarfélögum.

Reykjavíkurborg stendur frammi fyrir því að brúa milljarða gat á næsta ári, og næstu ár; ef marka má formann borgarráðs. Hann sagði í gær að hækka þyrfti skatta og gjöld, auk þess að skera niður.

En hvaða áhrif gætu skatta og gjaldahækkanir haft? Ekkert hefur verið ákveðið, en fréttastofan veit, að kannað hefur verið hvernig staða mála er á tekjuhliðinni í nágrannasveitarfélögum höfuðborgarinnar.

Útsvarsprósentan í Reykjavík er 13,03% en í Hafnarfirði og Kópavogi, svo dæmi sé tekið er hún 13,28%. Á Álftanesi, sem raunar er í afar sérstakri stöðu, er útsvarsprósentan 14,61%.

Við skulum búa okkur til dæmi af fjögurra manna reykvískri fjölskyldu. Gefum okkur að tekjur hennar séu samanlagt 600 þúsund krónur á mánuði og að þau búi í húsnæði sem metið er á 20 milljónir.

Meðal gjalda sem þau greiða eru útsvarið fasteignaskattur, leikskólagjöld, skólamáltíðir og frístundaheimili. Og heildarútgjöldin rúmlega 400 þúsund krónur á ári.

Upphæð gjalda og prósentur eru mismunandi milli sveitarfélaga; en ef við tökum þessi gjöld saman þá yrði heildartalan fyrir þessa tilbúnu fjölskyldu, ef Reykjavík yrði á pari við Kópavog, hugsanlega um 75 þúsund krónum hærri yfir árið. Þá er tekið tillit til þess að útsvarið er hærra þar. Nú ef miðaða er við Hafnarfjörð, gæti talan orðið yfir 170 þúsund á ári.

Á Álftanesi ætti þessi fjölskylda minnst, eftir skatta; enda útsvarið þar hærra, og þar eru gjöldin líka hærri. Yrðu skattar og gjöld í Reykjavík færð til samræmis við þetta yrði munurinn um 400 þúsund krónur á ári.

Hins vegar er rétt að taka fram að þetta gefur mjög takmarkaða mynd af þjónustu sveitarfélaganna á heildina litið. Enn fremur felst í þessu lítil vísbending um lífsgæði eða hamingju íbúa á hverjum stað.