Iðnaðarráðherra: Rúm fyrir stórframkvæmdir

Brýnasta viðfangsefnið um þessar mundir er að koma stórum verkum og smáum á skrið fyrir vorið til þess að bæta atvinnuástandið. Í hagkerfinu er rúm fyrir stórframkvæmdir á næstu misserum. Þetta var meðal þess sem kom fram í ræðu Katrínar Júlíusdóttur, iðnaðarráðherra, á Iðnþingi í dag.

„Ég tel að við eigum að leggja allt kapp á að ýta undir beina erlenda fjárfestingu í þau stórverkefni sem framundan eru enda búum við nú við löggjöf sem tryggir vatnsauðlindirnar og veiturnar hjá ríki og bæjarfélögum en heimilar einkafjármagn í orkuöflun og orkusölu. Ég geri ekki greinarmun a innlendri og erlendri fjárfestingu heldur aðeins á traustum fjárfestum og ótraustum, sagði Katrín.

Ráðherrann að nú þegar hafi verið gripið til harkalegs niðurskurðar og skattahækkana til þess að rétta við skuldir ríkissjóðs. „Við Íslendingar höfum gengið inn í hreinsunareldinn," sagði Katrín og bætti við að búið væri að gera upp gömlu bankanna í sátt við lánadrottna. Auk þess væri verið að gera upp orsakir bankahrunsins á vettvangi Alþingis og dómstóla. Á meðan væru aðrar þjóðir vart byrjaðar að gera upp sínar syndir.

„Vondu fréttirnar eru þessar: Fjárfesting dróst saman um helming á Íslandi á sl. ári og um 39% á heimsvísu. Atvinnuleysi mun verða okkar helsta böl á Íslandi næstu misseri komi ekki til nýrra fjárfestinga. Góðu fréttirnar eru að það er rúm fyrir stórframkvæmdir í hagkerfinu á næstu misserum án þess að þær ryddu burt sprotum og nýskapandi starfsemi. Hér er því lag sem við þurfum að hagnýta okkur," sagði Katrín.