Alþingismenn hvattir til að skrifa undir eið

Hópur fólks hefur sett á laggirnar heimasíðu á slóðinni heidur.is þar sem alþingismenn eru hvattir til þess að setja nafn sitt við yfirlýsingu sem birtist á síðunni.

Með því að skrifa undir heita þingmennirnir því að setja hagsmuni þjóðarinnar framar hagsmunum flokksins, sjálfs sín og hvers konar sérhagsmuna, flytja mál, tala og kjósa í hverju máli samkvæmt eigin sannfæringu og gera í staði sitt besta til að standa undir því trausti sem þeim er sýnt.

Þá heita þingmennirnir því að meta skoðanir og hugmyndir á eigin verðleikum óháð því hver setur þær fram og virða þá sem eru þeim ósammála, kynna sér rök þeirra og skilja til hlítar hvar þeim greinir á. Þá eru þingmenn hvattir til að orða skoðanir sínar á þann hátt að það leiði til samstöðu og sátta, frekar en sundrungu.

Að síðustu heita þeir þingmenn sem skrifa undir yfirlýsinguna að byggja skoðun sína á öllum staðreyndum mála, einnig þeim sem ekki henta eigin málstað og að vera tilbúnir til að skipta um skoðun ef nýjar upplýsingar, skilningur eða aðstæður kalla á það - „og unna öðrum hins sama," eins og segir að lokum.

„Jafnframt heiti ég því að hafa í huga að aðrir Alþingismenn eru samstarfsmenn mínir - og eru líka hér til að vinna Íslandi vel. Það sem skilur okkur að eru þær leiðir sem við teljum líklegastar til árangurs. Við erum því ekki andstæðingar, heldur samherjar í því að vinna að hagsmunum þjóðarinnar," segir að síðustu.

Almenningi gefst kostur á að skrá sig í Facebook hóp sem settur hefur verið upp þar sem skorað er á alþingismenn að setja nafn sitt við yfirlýsinguna.

Enn sem komið er hefur enginn þingmaður gengist opinberlega undir yfirlýsinguna en það geta þeir meðal annars gert með því að ganga í Facebook hópinn hér.