Ekki næg orka fyrir bæði álver og metanólverksmiðju

Metanólverksmiðja, sem Carbon Recycling undirbýr nú í Kröflu í samvinnu við Landsvirkjun, útilokar álver á Húsavík en gæti skapað allt að 25 ný störf í Mývatnssveit. Í febrúar skýrist hvort áformin verða að veruleika en þangað til býður Landsvirkjun nokkrum aðilum að bítast um orku Þingeyinga.

Carbon Recycling er að meirihluta í eigu íslenskra fjárfesta og er þegar byrjað að reisa í Svartsengi fyrstu verksmiðju sinnar tegundar í heiminum, sem mun nota koltvísýring úr borholum HS Orku og raforku til þess að framleiða metanól, öðru nafni tréspíritus.

Aðferðin nýtur einkaleyfis og hefur verið þróuð í tilraunaverksmiðju á Höfðabakka í Reykjavík á undanförnum árum en metanól er einkum notað til blöndunar í bílabensín og má nota alfarið í sumum bíltegundum.

Carbon Recycling hefur uppi stór áform og hefur nú undirritað viljayfirlýsingu við Landsvirkjun um undirbúning eldsneytisverksmiðju við hlið Kröfluvirkjunar. Verksmiðjan þar yrði 20 sinnum stærri en sú sem rís í Svartsengi og öll framleiðslan seld úr landi.

Að sögn Benedikts Stefánssonar hjá Carbon gæti fyrri áfangi verksmiðjunnar verið tilbúinn árið 2013, og þar myndu starfa 10 til 15 manns. Þegar síðari áfanginn yrði tilbúinn, hugsanlega árið 2014, gætu bæst við tíu störf.

En það er önnur hlið á þessu máli því að á meðan Mývetningar sæju fram á ný störf sætu áhugamenn um álver við Húsavík eftir með sárt ennið því það yrði um leið nánast slegið út af borðinu. Metanólverksmiðjan þarf mikla orku, 50 megavött, álíka og Kröfluvirkjun framleiðir nú, en við undirbúning álvers á Bakka hefur verið gengið út frá því að það þyrfti alla tiltæka orku á svæðinu, og jafnvel meira til.

Hörður Arnarson, forstjóri Landsvirkjunar, tekur þó fram að viljayfirlýsing við Carbon Recycling sé ekki skuldbindandi. Viðræðum verði haldið áfram við þá 4-5 aðila, sem sækjast eftir orkunni, þar á meðal við bæði Alcoa og Bosai, sem sýnt hafa áhuga á álveri.

Það er hins vegar í febrúar sem stefnt er að því að það skýrist hvort metanólverksmiðja rísi við Kröflu. Aðrir áhugasamir kaupendur að orkunni í Þingeyjarsýslum hafa því ekki langan tíma til að bjóða betur.