Segir niðurstöðuna setja skýrt fordæmi

Niðurstaða áfrýjunarnefndar um samkeppnismál vegna samruna Vestia og Teymis setur skýrt fordæmi fyrir yfirtöku bankanna á fyrirtækjum á samkeppnismarkaði, segir Gylfi Magnússon, efnahags- og viðskiptaráðherra.

Í úrskurði áfrýjunarnefndarinnar frá því fyrir helgi er Samkeppniseftirlitinu gert að fjalla aftur um yfirtöku Vestia, dótturfélags Landsbankans, á Teymi, móðurfélagi Vodafone símafyrirtækisins. Nefndin beindi því til eftirlitsins að setja skilyrði fyrir samrunanum, og vísar til þess í úrskurði sínum að hætta geti verið á að samkeppni raskist vegna yfirtöku banka á fyrirtækjum á markaði.

„Þetta er mjög áhugaverður úrskurður, og blasir við að hann verður fordæmisgefandi að einhverju marki,“ segir Gylfi.

Þegar bankarnir yfirtaka fyrirtæki í stað þess að setja þau í þrot er það gert í þeim tilgangi að reyna að fá meira upp í skuldir með því að reka fyrirtækin áfram, og selja þegar betur árar. Þar geta samkeppnissjónarmið og hagsmunir bankans togast á, segir Gylfi. Miklu skipti fyrir samkeppnisaðila, eigendur og starfsmenn hvernig staðið sé að málum.

Þessi úrskurður leggur línurnar í þeim álitamálum, segir Gylfi.

Samkeppniseftirlitið fái aukin tæki, og fyrir það sé lagt að veita bönkunum meira aðhald þegar þeir taki yfir fyrirtæki.

„Væntanlega verða þá bankarnir að taka meira tillit til samkeppnismála og hafa fyrirtækin skemur undir sínum verndarvæng,“ segir Gylfi. Þó verði að taka tillit til hagsmuna bankanna með því að neyða þá ekki til að selja fyrirtækin of snemma.

Gylfi segist ekki telja að stjórnvöld þurfi að breyta lögum sérstaklega til að auka við eða draga úr heimildum Samkeppniseftirlitsins vegna úrskurðar áfrýjunarnefndarinnar. Eðlilegt sé að áfrýjunarnefndin túlki lög og leggi línurnar, þó auðvitað sé svo hægt að kæra úrskurði nefndarinnar til dómstóla. Sé úrskurðunum ekki hnekkt fyrir dómstólum hafi þeir ótvírætt fordæmisgildi.brjann@frettabladid.is