Heillaði danskar stelpur með Skítamórals-slagara

„Ég fékk stefnumót, en ekki hvað?“ segir Guðmundur Heimir Jónasson, 21 árs gamall verslunarstjóri í Fötex, sem sló í gegn í danska stefnumótaþættinum Dagens Mand á TV 2. Heimir gerði sér lítið fyrir og heillaði dönsku stelpurnar upp úr skónum með Skítamórals-slagaranum Ertu þá farin? við góðar undirtektir bæði áhorfenda og stúlknanna.

„Ég veit ekki af hverju ég valdi þetta lag, þetta var bara það fyrsta sem kom upp í hugann á mér,“ segir Heimir og viðurkennir að hann hafi steingleymt textanum, það hafi ekki komið að sök því hvorki áhorfendur né stúlkurnar skildu hvað hann var að syngja. „Sumt af því sem ég söng meikaði engan sens, eða við skulum segja að þetta hafi bara verið önnur útgáfa af þessu lagi, mín útgáfa,“ útskýrir Heimir og hlær.

Heimir hefur verið búsettur í Danmörku í tíu ár, flutti til Kaupmannahafnar með móður sinni sem nú er flutt heim til Íslands aftur.

Hann segir vinkonu sína á Jótlandi hafa skráð hann til leiks í þættinum.

„Hún lýsti því yfir að hún ætlaði að koma mér í þáttinn. Skömmu seinna var hringt frá TV 2 og ég spurður hvort ég vildi ekki koma í prufur. Þarna var heill hellingur af strákum og við fórum inn, fjórir saman. Hinir þrír sögðust allir spila fótbolta og eitthvað í þeim dúr þannig að ég varð að koma með eitthvað annað,“ útskýrir Heimir sem lýsti því yfir í prufunum að hann væri mikið fyrir að ríða út á íslenskum hestum og semdi bæði íslensk lög og texta.

Herbragðið virkaði fullkomlega því skömmu seinna var Heimir kominn í útsendingu. „Þetta var svolítið fyndið því ég hef aldrei sungið fyrir framan neinn.“ Þátturinn gengur þannig fyrir sig að hópur stúlkna á lausu fær að kjósa hvort þær vilji fá stefnumót með álitlegum piparsveini og þurfa drengirnir að sanna sig fyrir þeim með hæfileikum sínum.

Og Heimir vann sér inn stefnumót, fór með laglegri snót á veitingastaðinn Costume House í miðborg Kaupmannahafnar og átti með henni notalega stund. Hann segir hins vegar ekkert framhald verða á því sambandi. „Nei, nei, þetta endaði bara þarna.“ Eftir situr hins vegar söngurinn og hinn sérstaka útgáfa af sveitaballarómans Einars Bárðarsonar sem Danirnir aldrei skildu.

freyrgigja@frettabladid.is.