Í eltingaleik við skýstrokka

Englendingurinn Alister Chapman starfar við að þefa uppi skýstrokka og ná af þeim myndum. Hann hefur séð 61 skýstrokk með berum augum og lýsir upplifuninni sem spennuþrungnu adrenalín-stuði.

Alister Chapman var staddur hér á landi á föstudag til að halda erindi hjá Sense, dótturfélagi Nýherja, um sjónvarp á vefnum og þrívíddar-upptökutækni sem hann hefur nýtt sér í starfi sínu. Slík tækni hefur verið að ryðja sér til rúms að undanförnu og vill Chapman miðla af reynslu sinni til Íslendinga.

Þessi geðþekki náungi hefur alla ævi haft mikinn áhuga á skýstrokkum og alls kyns óveðri og fór það ekki á milli mála í viðtalinu við Fréttablaðið. Áhuginn skein út úr augum hans og greinilegt að hann er á réttri hillu í lífinu, þótt óvenjuleg sé.

„Alveg síðan ég var lítill drengur hef ég haft mikinn áhuga á óveðri. Það var kannski mikill stormur úti og mamma faldi sig í skápnum undir stiganum heima á meðan ég var úti í glugga og horfði á eldingarnar,“ segir Chapman. Heillaðist af Twister í bíó

Eftir að hann sá kvikmyndina Twister, sem fjallaði um fólk sem elti uppi skýstrokka, fékk hann hugmynd að sjónvarpsþáttum sem National Geographic ákvað í framhaldinu að sýna. Síðan þá hefur hann eytt mánuði við upptökur á skýstrokkum og fellibyljum í Bandaríkjunum á hverju ári. Myndefnið selur hann víðs vegar um heiminn. „Kvikmyndin Twister var tiltölulega nýkomin út og ég heillaðist af henni. Þá fór ég að rannsaka málið og komst að því að maður gæti í raun og veru borgað fyrir að fá að elta uppi skýstrokka. Það hljómaði spennandi en kostaði þrjú þúsund dollara og var allt of dýrt fyrir mig,“ segir Chapman, sem sannfærði þá National Geographic um að ganga til liðs við sig. „Þannig að þau borguðu mér fyrir að elta skýstrokka,“ segir hann og ljómar allur í framan. „Fyrsti þátturinn okkar var um enskt par sem á 25 ára brúðkaupsafmæli sínu ákvað að elta skýstrokka. Á fjórða kvöldinu okkar sáum við ellefu skýstrokka. Við komumst mjög nálægt þeim og það var spennuþrungnasta stund lífs míns. Adrenalínið flæddi um æðar mínar. Frá þessari stundu var ég orðinn háður þessu og vildi meira.“ Lenti í miðjum skýstrokkiUm eitt hundrað manns starfa við að leita uppi skýstrokka og óveður rétt eins og Chapman. Þetta er snúið starf sem krefst mikillar nákvæmni og góðrar þekkingar á veðurfræði, enda eru Bandaríkin gríðarstór og alls ekki auðvelt að finna það sem menn leita að. Allt verður að ganga upp til að Chapman og félagar aki ekki hundruð kílómetra á sendiferðabíl sínum í erindisleysu.

Chapman hefur aldrei slasast alvarlega í starfi sínu, aðeins fengið nokkra marbletti og skrámur. „Ef þú býrð á svæði þar sem skýstrokkar eru algengir og þú fylgist ekki með veðrinu geta þeir rifið þakið af húsinu þínu með hræðilegum afleiðingum. En þegar þú ert að leita að skýstrokkum eins og við með radara og allar upplýsingar við hendina þá vitum við miklu meira en þetta fólk hvað er um að vera. Að því leytinu til er þetta frekar hættulítið,“ segir hann. Einu sinni lenti hann þó í mikilli hættu þegar skýstrokkur myndaðist fyrir ofan sendiferðabílinn þeirra. „Hann var rétt að byrja að myndast þannig að við ókum bara í burtu eins hratt og við gátum. Sem betur fer var þetta ekki risastór skýstrokkur þannig að við sluppum en hann elti okkur samt í 48 kílómetra. Við horfðum í baksýnisspegilinn og hugsuðum sífellt með okkur að núna væri hann að ná okkur.“ Hann bætir við að mikil hætta geti skapast vegna eldinganna í kringum skýstrokkanna og næst hafi þær komist um tuttugu metra frá honum.

Chapman er kvæntur og á tíu ára dóttur. Hann viðurkennir að eiginkonan hafi áhyggjur af sér en umberi starfið vegna peninganna sem það gefi af sér. Dóttir hans getur aftur á móti ekki beðið eftir að feta í fótspor hans. „Ég sagði henni að hún þyrfti að bíða þangað til hún yrði eldri svo hún gæti tekið upplýstari ákvörðun, því þetta er jú hættulegt.“

freyr@frettabladid.is