Jólagjöfin í ár er íslensk lopapeysa

Valinkunnir neyslufrömuðir sem Rannsóknasetur verslunarinnar fékk til liðs við sig hafa valið íslenska lopapeysu sem jólagjöf ársins 2010. Það er nú orðið árvisst að Rannsóknasetrið velji jólagjöf ársins.

Á síðasta ári var jólagjöf ársins „jákvæð upplifun" og árið 2008 var það íslensk hönnun. Árin þar áður hafði kveðið við annan tón en árið 2007 var jólagjöf ársins GPS staðsetningartæki og árið 2006 var hún ávaxta- og grænmetispressa.

Rökstuðningur dómnefndarinnar fyrir vali á lopapeysu í ár er að lopapeysa er vara semhefur gengið í endurnýjun lífdaga og er í raun orðin meiri tískuvara en nokkru sinni fyrr. Lopapeysa er ekki aðeins algeng hversdagsflík heldur er sífellt algengara að fólk mæti í lopapeysum á mannamótum. Lopi og lopapeysur seljast sem aldrei fyrr. Þannig er oftast þröng á þingi í hannyrðabúðum og þar sem prjónaflíkur eru seldar og prjónablöð og bækur eru ofarlega á metsölulistum bókaverslana.

Þá er það mat jólagjafanefndar að lopapeysa falli vel að tíðarandanum. Prjónaskapur er stundaður sem aldrei fyrr, bæði af konum og körlum. Víða hafa orðið til prjónaklúbbar þar sem ekki er aðeins setið og prjónað heldur skiptst á mynstrum og uppskriftum af lopapeysum, hnepptum og heilum, í mismunandi litum og sniðum. Hvar sem fólk kemur saman er prjónað.

Einnig er algengt að hefðbundið lopapeysumynstur sé notað í hönnun á öðrum fötum eins og stuttermabolum og ullarjökkum. Mynstrið er einnig notað á sérvéttum og íslenskum skrautmunum af ýmsum gerðum.

Neyslufrömuðir Rannsóknarsetursins sem völdu jólagjöfina í ár eru Eva Dögg Sigurgeirsdóttir, markaðsráðgjafi, Ingibjörg Magnúsdóttir, starfsmaður Neytendasamtakanna, Sævar Kristinsson, framkvæmdastjóri Netspors ehf. og Halla Helgadóttir, framkvæmdastjóri Hönnunarmiðstöðvar Íslands

Valið var úr miklum fjölda hugmynda sem bárust. Haukur Harðarsson sérfræðingur hjá Fræðslumiðstöð atvinnulífsins lagði til þá hugmynd sem varð fyrir valinu.

Rannsóknarsetrið spáir því að jólaverslunin verði óbreytt að raunvirði frá síðasta ári en vegna verðhækkana verði veltan 4% meiri í krónum talið. Áætlað er að heildarvelta smásöluverslana í nóvember og desember verði tæplega 60 milljarðar króna án virðisaukaskatts. Ætla má að hver Íslendingur verji að meðaltali 39.500 kr. til innkaupa sem rekja má til

jólahaldsins.