Tryggvi Þór óskaði eftir nefndarfundi

Tryggvi Þór Herbertsson, alþingismaður og annar fulltrúa Sjálfstæðisflokksins í efnahags- og skattanefnd hefur óskað eftir fundi í nefndinni vegna vaxtaálagna á atvinnulíf. Í tilkynningu frá þingflokknum segir að Tryggvi hafi farið fram á að fulltrúar Landsbankans yrðu kallaðir fyrir vegna fyrirætlana bankans um að hækka vaxtaálögur á sjávarútvegsfyrirtæki í 4% (úr 1,6-2%) á næstunni. „Tryggvi Þór telur að þetta muni veikja stoðir enn fleiri fyrirtækja en orðið er og auka mjög áhættu í kerfinu."

Fundurinn verður haldinn klukkan níu í fyrramálið, föstudaginn 29. janúar og hafa Arnar Þór Másson frá fjármálaráðuneyti, Þorsteinn Þorsteinsson stjórnarformaður Bankasýslu ríkisins verið boðaðir á fundinn. Auk þeirra mæta Landsbankamennirnir Ásmundur Stefánsson, Árni Þór Þorbjörnsson frkvstj. fyrirtækjasviðs, Þórir Örn Ingólfsson forstm. áhættustýringar og Haukur Halldórsson, stjórnarformaður.