Segir trúarbrögð eigi í takmörkuðu mæli að fá aðgang að skólum

„Enda þótt ég sé almennt þeirrar skoðunar að trúarbrögð eigi í mjög takmörkuðum mæli að fá aðgang að skólastofnunum, þá þarf að hyggja að ábendingum skólafólks um að ekki megi vanrækja skólann sem mikilvægan vettvang til að ná til mismunandi trúar- og menningarheima," sagði Ögmundur Jónasson, kirkjumálaráðherra, í ræðu sinni á kirkjuþingi í dag.

Þar var hann að vísa til umræðunnar um tillögur mannréttindaráðs Reykjavíkurborgar sem vill bannað trúboð í grunnskólum borgarinnar.

Ögmundur segir þau viðhorf heyrast viðruð að ganga eigi í gagnstæða átt og að trúarlíf eigi að fá ríkulegri aðgang að stofnunum, skólum og öllu opinberu lífi en nú er. Hann segir þessi viðhorf síður en svo einskorðuð við einhver ein trúarbrögð. Og hann biður þjóðkirkjuna að hafa það í huga.

Svo sagði Ögmundur:

„Verði okkur úthýst úr skólum og stofnanalífi, segir þessi hópur, hljótum við, með hliðsjón af þeim grunnreglum sem halda ber í heiðri um trúfrelsi og virðingu fyrir rétti minnihlutahópa, að fá að stofna sérstaka skóla með áherslu á okkar trúarbrögð með öflugum styrk frá ríkinu og ekki minni en almennir skólar fá.

Þetta viðhorf er vissulega til staðar hér á landi og hefur íslenkst samfélag svarað því, til dæmis með því að styrkja kaþólskan skóla í Reykjavík. Ekki er hann hverfisskóli en stuðningurinn byggist á þessari almennu afstöðu um að virða beri vilja fólks og er óháð því hvort vilji fólks tengist trúarbrögðum eða skólastefnu. En hversu langt værum við reiðubúin að ganga í þessu efni? Á að virða rétt allra trúarbragða með þessum hætti inni í stofnanakerfi landsins?"

Að lokum hvatti hann presta til dáða í þeim mótbyr sem þjóðkirkjan stendur í þessa dagana og bað þá um að beygja sig af auðmýkt en ekki hroka. Hann sagði orðrétt:

„Getum við hafið okkur yfir erfiðleikana? Getum við orðið sterkari eftir en áður? Getum við látið áföllin efla okkur? Svarið er já, en því aðeins að við beygjum okkur og hugleiðum í auðmýkt en ekki í hroka.