Vilja draga ESB-umsókn til baka - tillaga lögð fram eftir áramót

Tillaga um að umsókn Íslands að Evrópusambandinu verði dregin til baka verður lögð fram á Alþingi eftir áramót. Unnur Brá Konráðsdóttir þingmaður Sjálfstæðisflokksins leggur tillöguna fram. Fyrrverandi formaður segir tómarúm í flokknum varðandi Evrópumálin og kallar eftir forystu.

Þorsteinn Pálsson segir að ákveðið tómarúm sé á stóru svæði í Sjálfstæðisflokknum meðal þeirra sem fylgja ESB-málinu. Hann vonast til þess að það takist að virkja þennan kraft á hægri væng stjórnmálanna, þ.e kraft þeirra sem eru hlynntir því að klára samningsferlið. Þetta sagði hann í þættinum á Sprengisandi á Bylgjunni í morgun.

Þessi kraftur sem Þorsteinn vísar til er áhugi sjálfstæðismanna í atvinnulífinu um að Evrópumálin verði kláruð og áhugi innan þingflokksins. Þorgerður Katrín Gunnarsdóttir sat hjá og Ragnheiður Ríkharðsdóttir greiddi atkvæði með þegar Alþingi samþykkti að sækja um aðild að Evrópusambandinu. Þorgerður Katrín vill klára aðildarferlið og segir að við eigum að hætta með þennan hringlandahátt í kringum Evrópumálin. Þessari skoðun lýsti hún í Morgunblaðinu. Fleiri eru að skoða sína stöðu. Það er hins vegar annað afl á hreyfingu.

Síðasta vor lagði Unnur Brá Konráðsdóttir, þingmaður flokksins í Suðurkjördæmi, fram tillögu um að draga umsókn um aðild til baka en slík tillaga komst aldrei á dagskrá. Hún hefur nú endurbætt og umskrifað tillöguna.

Í stjórnarskránni kemur fram að þingmenn séu aðeins bundnir af sinni eigin sannfæringu. Unnur Brá, sem er á móti aðild að ESB, sagðist líta svo á að það væri hlutverk þingmanna flokksins að framfylgja ályktunum landsfundar og því legði hún tilllöguna fram. Hún sagðist meta stöðuna þannig að mikill stuðningur væri við slíka tillögu í þingflokknum.

Flokkurinn ályktaði á landsfundi að draga ætti umsóknina til baka.

Unnur Brá sagði aðspurð að Bjarni Benediktsson hefði ekki beðið hana um að hætta við að leggja tillöguna fram. Samkvæmt heimildum Stöðvar 2 innan úr þingflokki Sjálfstæðisflokksins hafa einhverjir þingmanna af því áhyggjur að slík tillaga muni skapa óánægju og valda deilum innan flokksins. Stöð 2 hefur heimildir fyrir því að margir stjórnarliðar vilji fá tillöguna og afgreiða hana því þeir séu fullir sjálfstrausts og hafi enga trú á því að hún verði samþykkt. thorbjorn@stod2.is