Vill hætta aðlögunarferli og hefja raunverulegar viðræður við ESB

Ögmundur Jónasson dóms-, mannréttinda og samgönguráðherra vill ljúka aðildarviðræðum við Evrópusambandið á næstu tveimur mánuðum. Hann segir yfirstandandi viðræður snúast of mikið um aðlögun Íslands að sambandinu.

Ögmundur Jónasson skrifar grein í Morgunblaðið í dag og segir mögulegt að ljúka viðræðum við Evrópusambandið á tveimur mánuðum, með því að hætta því sem hann kallar aðlögunarferli og taka upp raunverulegar viðræður.

Ögmundur segir að Vinstri grænir hafi reynt að telja Samfylkinguna á það í stjórnarmyndunarviðræðum að þjóðin greiddi atkvæði um hvort fara skyldi í aðildarviðræður áður en slíkar viðræður hæfust.

Samfylkingin hafi ekki fallist á það.Nú séu endalausir rýnihópar að störfum og Evrópusambandið beri í Íslendinga fé til að liðka fyrir í viðræðunum.

Íslendingum sé boðið í endalausar kynnisferðir til Brussel með góðum viðgjörningi. Hann segir ferlið byggja á aðlögun gömlu austur evrópuríkjanna þegar þau gerðust aðilar að sambandinu.

Í Morgunblaðsgreininni segir ráðherrann að honum sé löngu orðið ljóst að Evrópusambandið vilji Ísland.

Samningaferlið sé vísvitandi haft langt til að laða Íslendinga til fylgislags við sambandið. Grein Ögmundar birtist skömmu eftir að rúmlega hundrað félags- og stuðningsmenn Vinstri grænna skoruðu á forystu flokksins að fara að stefnu hans í evrópumálum, en í þeim hópi eru margir í pólitísku baklandi Ögmundar, sem telja að núverandi forysta flokksins hafi svikið stefnu hans.