Gagnrýnir stjórnvöld fyrir að vannýta fjölmiðlatækifærið

„Ég bið til æðri máttarvalda að stjórnvöld taki sönsum og noti þetta fjölmiðlatækifæri til þess að kynna málstað Íslendinga," segir einn forsvarsmanna Indefence-hópsins, Ólafur Elíasson, þegar Vísir hafði samband við hann í dag.

Hann var ekki búinn að kjósa en var búinn að vera í miklum samskiptum við erlenda blaða- og fréttamenn.

„Það er gífurleg traffík út af fjölmiðlamönnum," segir Ólafur og bætir við að þeir séu flestir agndofa vegna afstöðu Jóhönnu Sigurðardóttur um að sitja heima í stað þess að kjósa í þjóðaratkvæðagreiðslunni.

„Þeim þykir það mjög sérkennilegt að leiðtogi elsta lýðræðisríkis veraldar skuli tala lýðræðið niður og finnst þetta satt að segja ekki til fyrirmyndar," segir Ólafur sem ætlar að reyna að kjósa nú síðdegis.

Hann gagnrýnir stjórnvöld fyrir að nýta ekki betur erlenda fjölmiðla til þess að koma sjónarmiðum Íslendinga á framfæri.

Sjálfur er hann sammála formanni Framsóknarflokksins að kosningaþátttakan sé alls ekki dræm sé tekið mið af sambærilegum atkvæðagreiðslum erlendis.