Formaður fulltrúaráðsins vísar orðum bæjarstjórans á bug

Formaður fulltrúaráðs Sjálfstæðisfélaganna í Kópavogi vísar á bug orðum Gunnsteins Sigurðssonar, bæjarstjóra og oddvita sjálfstæðismanna, um að togstreita og óróleiki sé meðal sjálfstæðismanna í Kópavogi. Ekkert sé fjærri sannleikanum.

Gunnsteinn tók við sem bæjarstjóri í Kópavogi í júní eftir óróleika í bæjarpólitíkinni sem varð til þess að Gunnar Birgisson lét af embætti bæjarstjóra og tók sér hlé frá störfum sem bæjarfulltrúi.

Nú hefur Gunnsteinn ákveðið að gefa ekki kost á sér í komandi bæjarstjórnarkosningum. Ástæðan er óviðunandi togstreita og óróleiki í röðum sjálfstæðismanna í Kópavogi sem hann segir að hafi verið viðvarandi síðan í sumar. Í kvöldfréttum Ríkissjónvarpsins sagði bæjarstjórinn ennfremur að Gunnar og stuðningsmenn hans hafi unnið gegn sér.

Þetta kannast Óttar Felix Hauksson, formaður fulltrúaráðs Sjálfstæðisfélaganna í Kópavogi, ekki við. „Ég vísa því líka á bug að það sé óróleiki og togstreita meðal sjálfstæðismanna í Kópavogi. Þetta er ekki rétt."

„Gunnar er mjög vinsæll forystumaður," segir Óttar og bendir á að Gunnsteinn hafi skipað annað sæti á framboðslista sjálfstæðismanna í síðustu kosningum og Gunnar það fyrsta. Síðan þá hafi Gunnar stigið til hliðar vegna lífeyrissjóðsmálsins svokallaða en jafnframt gefið út að hann ætli að leiða Sjálfstæðisflokkinn til sigurs í bæjarstjórnarkosningunum í vor. Óttar telur líklegt að það hafi haft þau áhrif að Gunnsteinn sækist ekki eftir endurkjöri.

Fréttastofa reyndi að ná tali af Gunnari vegna málsins án árangurs.