Fleiri Kaupþingsmenn handteknir

Ingólfur Helgason, fyrrverandi forstjóri Kaupþings á Íslandi, og Steingrímur Kárason, framkvæmdastjóri áhættustýringar bankans, voru handteknir við komuna til landsins í nótt. Þeir voru yfirheyrðir snemma í morgun og í framhaldinu færðir í fangaklefa. Þetta kom fram í hádegisfréttum Ríkisútvarpsins.

Þeir Ingólfur og Steingrímur voru í æðstu stöðum innan bankans og nánir samverkamenn Hreiðars Más Sigurðssonar, fyrrverandi forstjóra, og Sigurðar Einarssonar, fyrrverandi stjórnarformanns bankans. Ekki liggur fyrir hvort farið verði fram á gæsluvarðhald yfir Ingólfi og Steingrími.

Síðastliðinn föstudag voru Hreiðar Már og Magnús Guðmundsson, fyrrverandi forstjóri Kaupþings í Lúxemborg, handteknir og síðar úrskurðaðir í gæsluvarðhald.