Stjörnurnar skína annars staðar en á Edduhátíðinni

„Þetta er óheppilegt. Gunni verður bara að fá verðlaunin,“ segir Björn Thors sem tilnefndur er í flokknum „meðleikari ársins“ á Edduverðlaunahátíðinni sem er á laugardagskvöld.

Fjórir af þeim fimm sem tilnefndir eru í flokki Björns komast ekki á verðlaunahátíðina þar sem þeir eru að sýna í leikhúsum borgarinnar. Björn, Ólafur Darri Ólafsson og Stefán Hallur Stefánsson eru allir að sýna Gerplu í Þjóðleikhúsinu og Rúnar Freyr Gíslason er að leika í Fjölskyldunni í Borgarleikhúsinu á sama tíma. Þetta þýðir að Gunnar Hansson verður sá eini sem tilnefndur er í flokknum „meðleikari ársins“ sem verður viðstaddur Edduna: „Já, er það? Þá verður mjög neyðarlegt ef ég vinn ekki,“ sagði Gunnar þegar Fréttablaðið færði honum þessi tíðindi til Svíþjóðar.

„Kannski get ég talað við strákana og fengið að taka á móti verðlaununum fyrir þá? Annars verð ég bara að fara að æfa svipbrigðin, reyna að vera „góði taparinn“. Þetta verður nefnilega mjög neyðarlegt ef ég verð einn í salnum, þá verður myndavélin bara á mér,“ segir Gunnar.

„Kannski er tilvalið að nota þetta tækifæri til að auglýsa eftir starfi þetta kvöld. Ef einhver vill fá mig til að skemmta get ég alveg mætt og gert það frítt.“

Hið sama er uppi á teningnum í flokknum „leikkona ársins í aðalhlutverki“. Þar verða Margrét Helga Jóhannsdóttir og Jóhanna Vigdís Arnardóttir að leika í Fjölskyldunni, Ilmur Kristjánsdóttir að leika í Gerplu og Kristbjörg Kjeld verður að frumsýna Hænuungana. Ilmur Kristjánsdóttir segir leiðinlegt að missa af hátíðinni. „En maður verður bara að dressa sig upp og kíkja á ballið,“ segir hún. „Svo verður maður bara með varaskeifu ef ske kynni að maður ynni.“

Björn Brynjúlfur Björnsson, stjórnarformaður Íslensku kvikmynda- og sjónvarpsakademíunnar, segir vandamálið óhjákvæmilegt.

„Þetta er á þannig kvöldi að það er ekki hægt að komast hjá þessu. Það er ekki hægt að loka leikhúsunum,“ segir Björn. „Við höfum alltaf setið uppi með þetta. Við þurfum að hafa þetta um helgi og undanfarið hefur þetta verið á sunnudögum en nú var ákveðið að hafa þetta á laugardagskvöldi og það er auðvitað stórt sýningakvöld. Þetta er bara eins og veðrið – það er bara eins og það er.“

hdm@frettabladid.is