Vötnin að þorna upp vegna hita og þurrks

„Þessi lága vatnsstaða er nú einfaldlega vegna þess hversu heitt hefur verið í veðri og úrkomulítið,“ segir Óli Þór Árnason, veðurfræðingur á Veðurstofu Íslands, um óvenjulega lágt yfirborð stöðuvatna á höfuðborgarsvæðinu um þessar mundir.

Óli Þór segir það hefðbundið að vatnsstaðan sé tiltölulega lág í ágúst og september. Hann kveðst ekki geta svarað því hvort ástandið nú sé sérstakt í sögulegu samhengi þar sem Veðurstofan hafi fremur nýlega tekið vatnamælingar frá Orkustofnun.

Staðan hér á höfuðborgarsvæðinu er alls ekki einstök. Til dæmis hefur verið vatnslítið á Vesturlandi og á Ströndum, þar sem Óli Þór segir sum stöðuvötn vart svip hjá sjón.

Þegar svona miklir þurrkar hafa verið þarf mikla úrkomu til að rétta stöðuna af. „Þetta gæti farið að lagast ef það koma nokkrir góðir rigningardagar. Þegar jarðvegurinn er orðinn svona þurr og harður rennur vatnið ofan af honum. Það þarf fyrst að blotna vel í til að vatnið haldist,“ segir Óli Þór, sem einmitt kveður von um rigningu á næstu dögum.

Rauðavatn virðist sérstaklega illa leikið af vatnsleysi. Óli Þór segir það og fleiri vötn á höfðuborgarsvæðinu gjalda fyrir hversu hátt þau standi. „Það er lítið aðrennsli svo þessi vötn eru mjög háð úrkomunni,“ segir veðurfræðingurinn.gar@frettabladid.is