Gutierrez: Messi klárar ferilinn hjá Barca

Hinn argentíski leikmaður Newcastle United, Jonas Gutierrez, segir að landi sinn Lionel Messi komi aldrei til með að spila á Englandi. Hann telur að Messi klári ferilinn í herbúðum Barcelona.

„Ég held að Messi ljúki ferlinum hjá Barcelona eins og hann hefur alltaf sagst ætla að gera. Á Spáni tala allir sama tungumálið og hann hefur verið þarna frá unga aldri," sagði Gutierrez í viðtali við The Mirror.

„Öll stærstu lið í Evrópu vildu óska þess að hafa hann í sínum röðum og hann gæti spilað vel hvar sem er, það er engin spurning. En hann er í Barcelona og er ánægður þar."

Messi hefur spilað frábærlega á tímabilinu og skoraði meðal annars fyrra mark Barcelona í mikilvægum 2-0 sigri liðsins gegn Real Madrid í gærkvöld. Baráttan er hörð í toppbaráttunni á Spáni og ljóst er að Messi mun spila lykilhlutverk á loka sprettinum.