Viðbragðshópar kallaðir saman vegna Eyjafjallajökuls

Viðbragðshópar Almannavarna og eldgosadeildar Veðurstofunnar hafa verið kallaðir saman, vegna mikils óróa undir Eyjafjallajökli. Hundruð skjálfta hafa verið undir jöklinum undanfarinn sólarhring.

Nokkur jarðskjálftavirkni hefur verið í Eyjafjallajökli frá því í desember en síðastliðinn sólarhring hefur smáskjálftavirkni aukist til muna á svæðinu. Síðustu vikur hafa skjálftar verið að mælast á 8-10 kílómetra dýpi en skjálftarnir nú eru örlítið grynnri.

Steinunn Jakobsdóttir veðurfræðingur á Veðurstofu Íslands segir það sem sé öðruvísi sé hversu þétt jarðskjálftavirknin sé nú.

„Þetta eru að vísu allt smáir skjálftar en þeir fara aðeins stækkandi, samt ekki nema rúmlega tveir þeir stærstu," segir Steinunn.

Steinunn segir að vegna þessarar miklu smáskjálftavirkni hafi verið ákveðið að funda í hádeginu á morgun. Þá mun samráðshópur vísindaráðs almannavarna hittast og bera saman bækur sínar.

Steinunn segist ekkert getað sagt til um hvort gos sé á næsta leyti. Virknin gæti aukist á næstunni og allt eins farið að gjósa. En síðan gæti það einnig gerst að þetta gengi niður og ekkert kæmi upp á yfirborðið.