Alvöru indí-hrærigrautur

Hljómsveitin Of Montreal hefur gefið út sína tíundu hljóðversplötu. Forsprakkinn Kevin Barnes segir útkomuna bæði dansvæna og fönkaða.

Tíunda hljóðversplata bandarísku indí-poppsveitarinnar Of Montreal, False Priest, er nýkomin út. „Þarna eru sterk R&B-áhrif og þarna er líka mikið af dansvænum og fönkuðum lögum. Við reynum líka að hafa þarna augnablik þar sem þú missir kjálkann af undrun, sérstaklega ef þú ert að hlusta á plötuna í heyrnatólum,“ segir forsprakkinn Kevin Barnes um hljóminn á plötunni.

Íslenskir tónlistarunnendur ættu að kannast við Of Montreal því hljómsveitin spilaði í Hafnarhúsinu á Iceland Airwaves-hátíðinni árið 2007 fyrir troðfullu húsi. Þá var sveitin að fylgja eftir plötunni Hissin Fauna, Are You The Destroyer?, sem kom sveitinni rækilega á kortið. Plötunni var hrósað í hástert og gagnrýnendur hrúguðu á hana stjörnum fyrir líflega og fjölbreytilega tónlistina þar sem mörgum stefnum var att saman í einn hressilegan indí-hrærigraut.

Of Montreal kemur frá Aþenu í Georgíu-fylki, rétt eins og hljómsveitirnar R.E.M. og B-52"s. Kevin Barnes stofnaði sveitina árið 1996 og er sagður hafa skírt hana Of Montreal eftir misheppnað ástarsamband við konu frá Montreal í Kanada. Hljómsveitin hefur á ferli sínum vaðið úr einum stílnum í annan og verið dugleg við að spila lög eftir aðra tónlistarmenn, alls 86 talsins. Barnes er sjálfur óútreiknanlegur á tónleikum. Hann hefur staðið á sviði í New York og flengt „svín“ í miðju lagi ásamt leikkonunni Susan Sarandon, setið á hestbaki og flutt sex lög nakinn í Las Vegas.

„Það væri hægt að líkja Kevin við náunga eins og Prince,“ segir Bryan Poole, gítarleikari Of Montreal. „Hann getur spilað á öll hljóðfæri og gert allt upp á eigin spýtur. Það er ákveðinn töfraljómi yfir svona náungum sem hafa gert alla hluti sjálfir.“

Hæfileikar Barnes virðast hafa fengið að njóta sín á plötunni því hún hefur fengið fína dóma, meðal annars fjórar stjörnur í bresku tónlistartímaritununm Q og Mojo.

freyr@frettabladid.is