Dæmdur í ársfangelsi fyrir amfetamínsmygl

Hæstiréttur staðfesti í dag eins árs fangelsisdóm yfir pólskum karlmanni sem ákærður var fyrir að smygla inn tæpu kílói af amfetamíni til landsins.

Fíkniefnunum var smyglað í póstböggli sem sendur var á pósthúsið í Árbæ. Í bögglinum voru matvæli og voru fíkniefnin falin í niðursuðudósum sem voru þar á meðal. Fíkniefnahundur varð efnanna var og fjarlægðu lögreglumenn efnin úr bögglinum. Maðurinn sótti hins vegar böggulinn á pósthúsið og var handtekinn eftir það.

Maðurinn var dæmdur í 12 mánaða fangelsi í Héraðsdómi Reykjavíkur þann 25. júní síðastliðinn auk brota vegna vörslu á 87 grömmum af kókaíni og að hafa ekið bifreið án réttinda. Hann áfrýjaði smygldómnum en Hæstiréttur staðfesti dóm Héraðsdóms.