Mikil tækifæri í heilsuferðarþjónustu

Katrín Júlíusdóttir, iðnaðar- og ferðamálaráðherra, segir mikil tækifæri felast í heilsuferðarþjónustu hér á landi. Stofnfundur Samtaka um heilsuferðaþjónustu er á morgun.

Katrín segir að niðurstöður vinnuhóps iðnaðarráðuneytisins sýna að með markaðssetningu undir sameiginlegu merki íslenskrar heilsuferðaþjónustu megi fjölga umtalsvert ferðamönnum sem hingað koma í hressingarmeðferðir ýmis konar.

„Uppbygging heilsuferðaþjónustu mun geta aukið arðsemi í íslenskri ferðaþjónustu, bæði vegna þess hvað markhópurinn er verðmætur og að þessi hópur komi allt árið um kring," segir ráðherrann.

Hægt að skilgreina heilsuferðaþjónustu afar vítt

Katrín segir að þetta verkefni eigi ekki eingöngu að taka til lækningaferðaþjónustu. Skilgreina megi heilsuferðaþjónustu mjög vítt.

„Þarna má fella undir baðmenningu, jarðhita, óspillta náttúru, gæði íslenskra matvæla, útivist og svo framvegis. Við eigum frábæra frumkvöðla í íslenskum ferðaþjónustuiðnaði og vonandi taka þeir sem flestir þátt í starfi hinna nýju samtaka um heilsuferðaþjónustu. Umtalsverð undirbúningsvinna hefur verið unninn í iðnaðarráðuneytinu í tengslum við þetta mál og sé miðað við þátttöku í vinnusmiðju sem haldin var á vegum Ferðamálstofu í nóvember, þá er geysilegur áhugi á meðal íslenskra ferðaþjónustuaðila að sækja inn á þennan markað," segir Katrín.

Katrín skipaði vinnuhóp síðastliðið haust til þess að koma með tillögur um hvernig mætti efla þennan þátt ferðamannaiðnaðarins. Magnús Orri Schram, þingmaður, hefur stýrt starfi hópsins og hann segir að mikill áhugi sé á meðal íslenskra ferðaþjónustuaðila að gera út á þennan markað.



Minna háð veðurfari en hefðbundinn ferðamennska

„Hér á landi höfum við glímt við vandamál sem tengjast því hvað ferðamannatíminn er stuttur. Það er allt uppbókað, bæði hótel, ferðir og bílaleigubílar yfir hásumarið og svo er mun minna að gera yfir vetrarmánuðina," segir þingmaðurinn.

„Með aukinni sókn í heilsuferðir þá vonumst við til að ná upp eftirspurn aðra mánuði ársins, en þessi ferðamennska er mun minna háð veðurfari en hefðbundinn ferðamennska," segir Magnús Orri.

Á morgun er formlegur stofnfundur Samtaka um heilsuferðaþjónustu. Fundurinn fer fram í nýja Nauthól við Nauthólsvík og hefst klukkan 9:30. Allir áhugasamir um málefni er hvattir til að mæta og mun Katrín Júlíusdóttir ávarpa fundinn.