Hermann Valsson: No komment

„Ég hef ekkert um þetta að segja," svaraði varaborgarfulltrúi Vinstri grænna, Hermann Valsson, sem var staddur í kvikmyndahúsi þegar haft var samband við hann vegna sérkennilegrar uppákomu sem varð á borgarstjórnarfundi í dag.

Þá greiddi hann atkvæði gegn frávísunartillögu meirihlutans vegna tillögu Ólafs F. Magnússonar um sameiningu Reykjavíkur og Álftaness.

Þegar Hermann var spurður um afstöðu sína til málsins á fundinum sagði hann fyrst já. Svo breytti hann svarinu í nei. Sóley Tómasdóttir, borgarfulltrúi Vinstri grænna, segist þá hafa sagt úr pontu:

„Við skulum sitja hjá."

Þá endurtók Hermann fyrra svar sitt - hann sagði nei og kaus því gegn frávísun.

Þegar hann var inntur eftir atvikinu í dag svaraði hann einfaldlega: „No komment."

Fyrr í kvöld sagði Sóley að hún hefði ekki verið að skipa einum né neinum gera neitt þó svo að þannig hefði mátt skilja uppákomuna. Hún var ritari á fundinum og tók niður atkvæðin í nafnakalli. Hún segist ekki hafa fengið tækifæri til þess að ráðfæra sig við Hermann áður en þau greiddu atkvæði.

„Vegna hlutverks míns sem skrifari þá kann að vera að þetta hafi hljómað eins og það gerði en ég var að reyna að miðla upplýsingum til Hermanns sem ég var ekki í stöðu til þess að gera," sagði Sóley og bætti við að það myndi ekki hvarfla að henni að segja einhverjum hvernig skyldi greiða atkvæði í borgarstjórn Reykjavíkur.