Búlgararnir tveir vilja vera áfram hjá Manchester City

Búlgörsku landsliðsmennirnir Martin Petrov og Valeri Bojinov hafa báðir lýst því yfir að þeir vilji vera áfram í herbúðum Manchester City á næstu leiktíð. Félagarnir hafa hins vegar báðir verið orðaðir við önnur félög undanfarið.

Petrov hefur verið nefndur sem líklegt skotmark fyrir Tottenham og Everton og Bojinov hefur verið orðaður við endurkomu í ítalska boltann.

Umboðsmaður Petrov segir leikmanninn mjög ánægðan að spila fyrir knattspynrustjórann Mark Hughes og ætli því að vera áfram á Borgarleikvanginum í Manchester.

„Petrov er samningsbundinn City og er afar sáttur með Hughes þannig að hann er ekki á förum. Þetta eru bara sögusagnir í dagblöðunum og það er enginn sannleikur í því að hann sé á förum," segir Franco Moretti í samtali við Sport.

Hinn 23 ára gamli Bojinov var hátt skrifaður þegar City keypti hann til félagsins á 5,75 milljónir punda árið 2007, eftir að hafa staðið sig vel hjá Fiorentina og Juventus í ítalska boltanum. En leikmaðurinn hefur hins vegar verið mikið meiddur og aðeins leikið ellefu leiki fyrir félagið á tveimur keppnistímabilum. Umboðsmaður leikmannsins segir að Bojinov hafi því mikinn metnað til þess að sanna sig í enska boltanum.

„Bojinov er búinn að vera mjög óheppinn með meiðsli en forráðamenn City hafa sannfært mig um að hann sé enn í framtíðarplönum félagsins. Bojinov er líka einbeittur í því að sanna sig með City í úrvalsdeildinni," segir Gerry Palomba umboðsmaður kappans.