Leikmenn Andorra dreymir um að skora á Wembley

Varnarmaðurinn Toni Lima hjá Andorra segir liðið hlakka mjög til leiksins gegn enska landsliðinu á Wembley-leikvanginum í kvöld í 6. riðli undankeppni HM 2010.

„Að spila á móti Englandi á Wembley verður sérstök upplifun. Þetta verður frábær stund. Englendingar eru betri en við á öllum sviðum knattspyrnunnar og við stöndum því frammi fyrir nánast óvinnandi vígi. England er með eitt besta landslið heims í dag en við munum reyna að standa okkur eins vel og mögulegt er," segir hinn 38 ára gamli Lima.

Lima segir dagsskipunina vera einfalda hjá Andorra, sem er númer 196 á heimslista FIFA, en það sé að halda markinu hreinu eins lengi og mögulegt sé. Draumurinn væri samt að skora mark á Wembley.

„Við lékum gegn Englandi í september og gerðum þeim þá erfitt fyrir en þeir unnu að lokum 0-2. Ef við náum að skora mark í þessum leik, þá yrði það eins og sigur fyrir okkur," segir Lima en flestir leikmenn landsliðs Andorra eru áhugamenn í fótbolta og hafa því aðra atvinnu, ólíkt stórstjörnunum sem þeir mæta í kvöld.