Lítur á Jóhönnu sem samherja í pólitík

Ögmundur Jónasson þingflokksformaður Vinstri grænna sagðist alltaf hafa litið á Jóhönnu Sigurðardóttur sem náinn og góðan samherja í pólitík þó þau væru ekki í sama stjórnmálaflokknum. Hann sagði skoðanir þeirra alltaf hafa farið vel saman en hann vildi horfa út fyrir persónur þegar talað væri um forystumenn nýrrar Ríkisstjórnar.

Ögmundur og Lúðvík Bergvinsson þingflokksformaður Samfylkingar voru gestir í Íslandi í dag fyrir stundu. Þeir vildu ekki staðfesta að búið væri að ná samkomulagi þessarra tveggja flokka með stuðnningi Framsóknarflokksins.

Lúðvík sagði ljóst að nýja Ríkisstjórn þyrfti að mynda hratt og örugglega. Hann sagðist vona til þess að menn myndu grípa til svokallaðra bráðaaðgerða sem Samfylkingin hefði sett fram ásamt Sjálfstæðisflokknum í október. Það hefði hinsvegar endað með því að Samfylkingin hefði farið til Sjálfstæðisflokksins með bænaskjal um að svo yrði gert í gær.