Hvetur Friðrik Ómar til að lagfæra Rómeó og Júlíu

„Ég myndi hvetja Friðrik til að fara inn í stúdíó og kippa þessu í liðinn, ég hef nú gert annað eins,“ segir Bubbi Morthens.

Friðrik Ómar fer rangt með texta Bubba-slagarans Rómeó og Júlía í nýrri útgáfu lagsins sem hann syngur með Jógvani Han­sen. Í útgáfunni, sem var eingöngu gerð fyrir útvarpið, syngur Friðrik: „Draumana tilbáðu þau“ í staðinn fyrir „Draumarnir tilbáðu þau“, eins og rétt er.

Bubbi segir að það taki í mesta lagi klukkutíma að lagfæra textann og hvetur Friðrik til að „negla“ þetta aftur, því merking textans sé einfaldlega kolröng í þessari útgáfu.

Þessu eru dyggir aðdáendur kóngsins sammála og hafa miklar umræður um málið sprottið upp á heimasíðunni Bubbi.is.

„Ég vil helst að menn fari rétt með textana mína, nema málvilla komi frá mér. Þá verða menn bara að éta það eftir mér,“ segir Bubbi. „Ég er mjög þakklátur og auðmjúkur að þeir skuli velja lag eftir mig að syngja en þetta er lítið mál að laga.“

Friðrik Ómar segist ekki hafa áttað sig á mistökum sínum fyrr en blaðamaður ræddi við hann.

„Við hljótum að græja þetta. Þetta eru einhver leiðinda mistök,“ segir hann, spurður hvort hann ætli aftur í hljóðverið.

„Þetta er ekki á neinni plötu enn þá, þannig að það er lítið mál að redda þessu.“

Friðrik er mikill aðdáandi Bubba og lagið Rómeó og Júlía er þar í mestu uppáhaldi.

„Þetta er bara geðveikt lag og þegar maður breytir útsetningunni er það enn þá gott. Það er hægt að gera margar útgáfur af því og það virkar alltaf.“

Þrátt fyrir mistökin í nýju útgáfunni segist Friðrik alltaf syngja lagið rétt á tónleikum.

„Ég tók þetta upp einn heima hjá mér, einn með sjálfum mér. Ég hef bara ekki heyrt þetta sjálfur.“

Lagið er eingöngu í flutningi Jógvans á nýrri plötu þeirra félaga, Vinalög, og þar fer Færeyingurinn rétt með textann. Bubbi segir það heiður að Færeyingur skuli syngja lag eftir sig, enda hafa þessir frændur okkar stutt vel við bakið á okkur Íslendingum í kreppunni.

„Það þarf ekkert að ræða það. Ég held ég hafi þakkað fyrir hönd íslensku þjóðarinnar í sjónvarpsþættinum í vetur sem ég tók upp í Færeyjum og söng fyrir þá. Þar þakkaði ég mikið fyrir.“

freyr@frettabladid.is