Gordon missir sæti sitt hjá Skotum

George Burley, landsliðsþjálfari Skota, hefur ákveðið að kippa markverðinum Craig Gordon hjá Sunderland út úr liðinu og hefur falið Rangers-markverðinum Allan McGregor stöðuna fyrir leikinn gegn Hollendingum á laugardaginn.

Gordon hefur verið fyrsti kostur hjá Sunderland síðan árið 2007 en hefur nú misst stöðu sína hjá enska úrvalsdeildarliðinu í hendur Marton Fulop.

"Allan McGregor fær að vera í byrjunarliðinu gegn Hollendingum af því Gordon hefur ekki átt fast sæti í liði Sunderland. Craig er góður markvörður en Allan stóð sig vel á móti Argentínu og er í góðu formi hjá Rangers, svo hann á skilið að fá tækifæri," sagði Burley.

Fjögur ár eru síðan McGregor spilaði sinn fyrsta landsleik, en leikurinn við Hollendinga yrði samt aðeins fjórði landsleikur hans á ferlinum.

Skotar mæta Íslendingum ytra eftir viku.