Tilbúin að eignast barn núna

„Ég er komin 20 vikur á leið og rétt farið að sjá á mér," svarar Ragnheiður Guðfinna Guðnadóttir fyrrum fjölmiðlakona þegar Vísir spyr um meðgönguna og tilveruna yfirleitt.

„Það er voða gaman núna þegar maður finnur bumbuna vaxa og dafna. Mér hefur liðið alveg frábærlega frá fyrsta degi, ógleði gerði jú vart við sig fyrst en það er nú ekkert til að kvarta yfir þegar maður á von á svona kraftaverki í heiminn," segir Ragnheiður.

Ertu dugleg að hreyfa þig? „Já ég stunda hreyfingu á hverjum degi enda þrefalt orkumeiri á meðgöngu en vanalega. Það er líka nauðsynlegt að vera í góðu formi á meðgöngunni og sérstaklega í fæðingunni. Þannig að mér finnst nauðsynlegt að líkami og sál séu í góðu lagi á þessum besta tíma lífsins sem maður á að njóta í botn."

Finnur þú mikinn mun ef þú berð saman fyrri meðgöngu? „Nei alls ekki. Eini munurinn er að ég er mun meðvitaðri um meðgönguna núna heldur en með fyrsta barn. Ég hef alltaf stundað heilbrigðan lífsstíl og það breytist ekki neitt þó ég sé ófrísk eða ekki, ef eitthvað er þá frekar að maður verði enn heilbrigðari á meðgöngu.

Á fullu í Háskólanum

„Ég er á fullu í sálfræðinni við HÍ, er einnig að vinna við markaðs og sölumál á lífrænum og náttúrulegum fæðubótarefnum og vítamínum. Mér finnst frábært að geta leiðbeint og hjálpað fólki að öðlast og eigna sér frábæran og heilbrigðan lífsstíl sem inniheldur góða næringu, hreyfingu og sterka sjálfsmynd."

„Einnig er ég að aðstoða hann Ólaf Þór Ævarsson geðlækni með námskeið á vegum Streituskólans stress.is sem er æðislega gefandi og gaman, eitthvað sem allir þyrftu á að halda núna," segir Ragnheiður.

Lykillinn að hamingjunni

„Efst á lista er að vera dugleg að dýfa mér á bólakaf í námið, ná önninni með stæl en strax eftir próf er ég sett, þannig að þá tekur bara eitt frábærasta verkefni við, sem er að verða móðir í annað sinn, annast lítið kríli, huga og hlúa að fjölskyldunni," svarar Ragnheiður.

„Til að maður sé sáttur og hamingjusamur í þessu lífi skiptir mestu máli að hlúa að sjálfinu þínu þá getur þú sinnt öllu öðru í kringum þig og notið þess að lifa lífinu lifandi og tekið við ást og umhyggju allra þeirra sem þú hefur í kringum þig."

„Árið á að verða streitulaust, ánægjulegt og gefa af sér góðar stundir sem ég mun þakka fyrir í framtíðinni. Fjölskyldan, hamingjan og heilsan er eitthvað sem toppar allt þetta veraldlega sem fólk er sífellt að glíma við að eignast eða verða," segir Ragnheiður að lokum.