Eriksson ætlar ekki að taka við sænska landsliðinu

Sænska knattspyrnusambandið hefur staðfest að Sven-Göran Eriksson muni ekki taka við sænska landsliðinu af Lars Lagerback. Eriksson gefur einfaldlega ekki kost á sér í verkefnið.

Eriksson tók við sem yfirmaður knattspyrnumála hjá Notts County í sumar og á mikið verk fyrir höndum þar að koma liðinu á stall með þeim bestu.

Einhverjar sögusagnir voru um að Eriksson gæti hugsanlega sameinað þessi tvö störf en svo virðist ekki vera.

Roy Hodgson, stjóri Fulham, var einnig á óskalista sænska knattspyrnusambandsins en hann ætlar að halda áfram með Fulham.

Leit Svía að nýjum þjálfara heldur því áfram.