Þurfti að fórna golfhring fyrir umræður um Icesave

Golfurum brá brún þegar þeir bókuðu sér rástíma í Grafarholti í dag. Þar gaf að líta nafn Sigmundar Ernis Rúnarssonar, þingmanns Samfylkingarinnar, sem átti skráðan rástíma klukkan 13:50 í dag en umræða um Icesave hefst klukkan þrjú.

Þótti sumum það fullgróft að þingmaðurinn ætlaði að spila 18 holur meðan mikilvægasta mál Íslendinga er rætt í þinginu.

„Ég pantaði þetta með góðum fyrirvara þegar ég hélt það yrði ekki þing í dag," segir Sigmundur sem var staddur í þinginu þegar fréttastofa náði tali af honum. Hann segir þetta veruleika sem golfarar á þingi búa við - að þurfa að slá af rástíma á síðustu stundu vegna þingstarfa.

Sigmundur segir vinnuna að sjálfsögðu hafa forgang. „Ég þurfti að senda konuna eina ásamt systur sinni og mági," segir hann. Aðspurður hvort að forgjöfin væri ekki í hættu ef áfram heldur sem horfir svaraði hann hlæjandi: „Jú forgjöfin fer alveg til andskotans með þessu áframhaldi."