Óskarinn ekki til Scorsese

Væntanleg mynd Martins Scorsese, Shutter Island verður ekki frumsýnd í Bandaríkjunum í október á þessu ári eins og áður var fyrirhugað heldur verður færð fram í febrúar. Sem þýðir bara eitt, hún mun ekki keppa um næstu Óskarsverðlaun. Fréttin hefur farið eins og eldur í sinu um netheim kvikmyndanördanna, en myndin var talin afar líkleg til vinnings.

Haft er eftir talsmanni Paramount á heimasíðu Empire að þessi ákvörðun hafi verið tekin til að gefa framleiðendum svigrúm í breyttu efnahagslegu ástandi heimsins, þar sem myndin hafi farið í framleiðslu við mjög erfiðar aðstæður. Hann sagðist þó fullviss um að seinkunin geri veg myndarinnar meiri.

Í kjölfarið hófust umræður um þessa undarlegu ákvörðun. Einhverjir telja ástæðuna þá að Leonardo DiCaprio, sem fer með aðalhlutverk, sé bundinn í öðru á þeim tíma sem myndin hefði annars verið kynnt. Aðrir segja vandann liggja hjá markaðsdeild Paramount sem eigi ekki fyrir því að blása myndina upp á svokölluðum keppnistímum. Hver sem ástæðan er munum við þurfa að bíða.