Veitt mikil athygli að utan

Tónlistarmanninum Einari Tönsberg, betur þekktur sem Eberg, hefur verið boðinn samningur hjá útgáfu- og umboðsfyrirtækinu Kobalt Music Publishing, en fyrirtækið hefur tónlistarmenn á borð við Kelly Clarkson, Busta Rhymes og Moby á sínum snærum.

„Kobalt er búið að bjóða mér höfundarréttarsamning sem þýðir að þeir munu reyna að koma tónlistinni minn áleiðis til annarra, til dæmis fá mig til að semja tónlist fyrir aðra listamenn og fyrir auglýsingar og sjónvarpsþætti. Maður hefur því um meira að velja en er í boði hér heima og þar að auki væru launin betri,“ útskýrir Einar sem er um þessar mundir að fara yfir samninginn.

Auk þess að hafa boðist samningur frá Kobalt hefur útgáfufyrirtækið Parlophone sett sig í samband við Einar vegna hljómsveitarinnar Feldberg, en þar syngur Einar ásamt söngkonunni Rósu Birgittu Ísfeld. „Þeir höfðu samband við okkur eftir að hafa heyrt lagið Don‘t be a Stranger og vildu fá að heyra meira efni með okkur. Við erum búin að vera í samskiptum við þá síðan og þeir hafa áhuga á að skoða málin betur.“

Parlophone gefur út tónlist ýmissa þekktra hljómsveita og má þar nefna hljómsveitir á borð við The Verve, Interpol, Lily Allen og Radiohead. Einar hefur þó báðar fætur á jörðinni og segir ekki öruggt að Feldberg landi samning hjá fyrirtækinu þrátt fyrir áhugann. „Maður hefur oft lent í svona áður og það er ekki öruggt að nokkuð verði úr þessu. En þetta er spennandi og öll athygli hjálpar til.“

Fyrsta plata Feldbergs er væntanleg innan skamms og segir Einar að ætlunin sé að halda útgáfutónleika í nóvember.