Djokovic of sterkur fyrir Nadal - mætir Federer í úrslitum

Serbinn Novak Djokovic bókaði farseðilinn í úrslit Cincinnati Masters-mótsins í tennis með öruggum sigri gegn Spánverjanum Rafael Nadal í tveimur settum.

Djokovic mætir Svisslendingnum Roger Federer í úrslitunum.

Nadal, sem er að vinna sig til baka eftir hnémeiðslin sem héldu honum frá þátttöku á Wimbledon-mótinu fyrr í sumar á enn talsvert í land með að komast í sitt besta stand og vonast væntanlega til þess að hann nái því fyrir Opna-bandaríska meistaramótið sem hefst í lok ágúst.

„Þetta hafa verið mikilvægar vikur fyrir mig upp á framhaldið að gera. Að koma til baka og vinna nokkrar viðureignir hefur gefið mér sjálfstraust og ég er bara mjög ánægður.

Það sýndi sig gegn Novak að ég er ef til vill ekki hundrað prósent tilbúinn en ég er að komast þangað," sagði Nadal eftir tapið gegn Djokovic.