Weir og Broadfoot úr leik hjá Skotum

Varnarmennirnir David Weir og Kirk Broadfoot verða ekki með skoska landsliðinu gegn Hollandi og Íslandi nú um mánaðamótin.

Auk þeirra hefur miðvallarleikmaðurinn Kris Commons neyðst til að draga sig úr hópnum sem mætir Hollandi en vonast er til þess að hann verði orðinn klár fyrir leikinn gegn Íslandi. Sá leikur fer fram á miðvikudaginn í næstu viku.

George Burley, landsliðsþjálfari Skota, hefur bætt Steven Whittaker, leikmanni Rangers, í leikmannahópinn.

Þá eru þeir Barry Ferguson landsliðsfyriliði og Stephen McManus einnig tæpir vegna meiðsla. McManus er fyrirliði Celtic í heimalandinu.

Það yrði gríðarlega mikið áfall fyrir þá að missa þessa menn einnig úr leikjunum gegn Hollandi og Íslandi. Ferguson er lykilmaður Skota á miðjunni og McManus er með sterkari varnarmönnum liðsins.

Hvorki Weir né Ferguson voru reyndar ekki með gegn Íslandi þegar liðin mættust á Laugardalsvellinum í haust vegna meiðsla en þeir McManus, Broadfoot og Commons voru þá allir í byrjunarliðinu.

Fyrirfram hefði mátt áætla að þeir Weir og McManus mynduðu miðvarðarpar skoska landsliðsins í leikjunum gegn Hollandi og Íslandi auk þess sem að Ferguson spilar nánast örugglega á miðjunni með Darren Fletcher verði hann heill. Kirk Broadfoot leikur yfirleitt í stöðu hægri bakvarðar.