England með eitt besta lið í heimi

Thierry Henry, leikmaður Barcelona, telur að Englendingar þurfi ekkert að skammast sín fyrir knattspyrnulandsliðið sitt. Þeir séu þvert á móti með einn besta leikmannahóp heims.

Enska landsliðið hefur lítið annað gert á undanförnum árum en að valda vonbrigðum. Liðið varð síðast heimsmeistari árið 1966 og hefur ekki komist í undanúrslit á stórmóti síðan 1996 er EM var haldið í Englandi.

Liðinu hefur þó gengið vel í undankeppni HM 2010 þar sem liðið hefur unnið alla fjóra leiki sína til þessa. Næst mætir England liði Úkraínu á heimavelli á miðvikudaginn í næstu viku.

„Ég hef alltaf haldið því fram að þið Englendingar væruð með eitt besta lið í heimi," sagði Henry í samtali við enska götublaðið The Sun.

„Sjáið bara leikmenn eins og John Terry, Ashley Cole, Frank Lampard, Steven Gerrard, Wayne Rooney og Rio Ferdinand. Þetta eru leikmenn sem standa sig í hvaða keppni sem er, hvort sem það er í ensku úrvalsdeildinni eða Meistaradeildinni."

„Gerrard gæti komist í byrjunarlið hvaða félags sem er. Það sama má segja um Lampard, Rooney, Terry og Ferdinand."

„Ég gæti farið svona í gegnum allan leikmannahópinn. Þið eruð með sex eða sjö leikmenn sem eru í algjörum heimsklassa."

Henry sagði einnig að Theo Walcott, fyrrum samherji hans hjá Arsenal, eigi góðan möguleika á því að komast í þennan hóp.

„Hann er enn ungur og þarf tíma," sagði Henry. „Þegar hann nær 100 leikjum þá mun hann búa yfir öllum þeim hæfileikum sem þarf til að ná í allra fremstu röð."