Rétt hjá þjálfaranum að velja mig ekki í landsliðið

Patrick Vieira segir það hafa verið rétta ákvörðun hjá landsliðsþjálfaranum, Raymond Domenech, að velja sig ekki í franska landsliðið fyrir tvo lykilleiki sem bíða Frakka.

„Skilaboðin sem við vildum senda með þessari ákvörðun er sú að menn verða að vera í toppformi til þess að komast í franska landsliðið. Patrick er ekki í slíku standi í dag og það þykir mér miður," sagði Domenech um Vieira sem hefur leikið 106 landsleiki fyrir Frakka. Vieira er að glíma við smávægileg meiðsli þessa dagana.

„Á einhverjum tímapunkti verðum við að sætta okkur við raunveruleikann. Þetta hefur ekkert mikið með meiðslin að gera en mig vantar spiltíma og takt í minn leik," sagði Vieira.

Domenech valdi Abou Diaby hjá Arsenal í hópinn fyrir Vieira.