Steve Bruce bálreiður Zaki

Steve Bruce, knattspyrnustjóri Wigan, er bálreiður Egyptanum Amr Zaki sem hefur enn ekki mætt til vinnu sinnar hjá félaginu eftir landsleikjafríið um þarsíðustu helgi.

Egyptaland gerði um helgina 1-1 jafntefli við Zambíu fyrir rúmri viku og skoraði Zaki mark Egyptalands í leiknum.

„Við höfum ekki heyrt neitt í honum. Við ræddum þó lengi við umboðsmanninn hans á bæði mánudag og þriðjudag í síðustu viku," sagði Bruce. „Við teljum að hann sé meiddur á vöðva aftan í læri en vitum ekki hversu slæmt það er. En sú vanvirðing sem hann hefur sýnt er ótrúleg, ekki aðeins gagnvart félaginu heldur einnig liðsfélögum hans."

Zaki var í haust lánaður til Wigan frá El Zamalek í heimalandi hans og skoraði níu mörk í sínum fyrstu þrettán leikjum á tímabilinu. Hann hefur hins vegar ekki enn skorað á þessu ári.

Þetta er heldur ekki í fyrsta sinn sem hann mætir seinna en áætlað var til félagsins úr landsleikjafríi. Bruce hefur nokkrum sinnum sektað hann og gæti gert það aftur nú.