Mourinho hefur trú á Englandi

Jose Mourinho segir að England verði að telja ein af sigurstranglegustu þjóðunum á HM í Suður-Afríku á næsta ári.

England vann 4-0 sigur á Slóvakíu í vináttulandsleik í gær og mætir Úkraínu í undankeppni HM á miðvikudaginn. England er enn með fullt hús stiga í undankeppninni.

„England er með það gott lið á pappírnum að það verður að taka það alvarlega í Suður-Afríku. Enska liðið er án efa eitt af fimm sigurstranglegust liðunum," sagði Mourinho í samtali við enska fjölmiðla.

„Sem knattspyrnustjóri verð ég að segja að hópurinn lítur vel út. Leikmönnum hefur þó ekki tekist að skapa almennilega heild á undanförnum stórmótum."

„En Rio Ferdinand og John Terry mynda til að mynda eitt sterkasta miðvarðapar í heiminum."

„En vandamál Englendinga hefur aldrei snúist um gæði leikmanna. Heldur hefur vandamálið að fá þá til að mynda góða heild."

„En öll lið munu óttast það að mæta Englendingum með þessa leikmenn innanborðs og einn besta þjálfara í heimi á bak við sig. "