Heskey ekki með gegn Úkraínu

Emile Heskey hefur neyðst til að draga sig úr enska landsliðshópnum fyrir leik Englands gegn Úkraínu í undankeppni HM 2010 á miðvikudagskvöldið.

Heskey skoraði fyrsta mark Englands í 4-0 sigri þess á Slóvakíu í vináttulandsleik þjóðanna í gær. Skömmu síðar þurfti hann að fara af velli vegna meiðsla.

Carlton Cole, leikmaður West Ham, kom inn á sem varamaður fyrir Heskey en meiddist einnig og verður ekki heldur með á miðvikudaginn.

Þá þykir Peter Crouch, sem kom inn á sem varamaður fyrir Cole í leiknum, einnig vera tæpur vegna meiðsla.

Fabio Capello landsliðsþjálfari Englands hefur valið Darren Bent, sóknarmann Tottenham, í enska landsliðshópinn vegna þessa en óvíst er hvort að Capello muni fá annan sóknarmann í landsliðshópinn.

Þeir Michael Owen hjá Newcastle og Kevin Davies hjá Bolton þykja helst koma til greina en Capello sagði eftir leik í gær að hann myndi ekki velja þá.

„Owen spilaði í aðeins 20 mínútur í síðasta leik og það er ekki nóg. Það myndi ekki heldur vera Kevin Davies," sagði Capello.

Hann sagði einnig að Rio Ferdinand hefði getað spilað í leiknum í gær en hann hefði ekki viljað taka neina áhættu. Shaun-Wright Phillips hvíldi einnig vegna meiðsla en verður klár á miðvikudaginn.

Enskum fjölmiðlum þykir líklegast að Wayne Rooney verði fremsti sóknarmaður Englands í leiknum á miðvikudaginn og að Steven Gerrard verði svo fyrir aftan hann.