Brynjar reiknar ekki með að ná Skotaleiknum

Miðjumaðurinn Brynjar Björn Gunnarsson segist ekki búast við því að koma við sögu í landsleik Íslendinga og Skota ytra í undankeppni HM í næstu viku.

Reading-maðurinn meiddist á læri í leik liðsins gegn Crystal Palace um helgina og segir að þó meiðslin séu ekki alvarleg, verði hann tæplega klár í landsleikinn.

"Ég held að þetta séu ekki alvarleg meiðsli en ég vonast til að ná leiknum við Coventry (um aðra helgi). Ég hef ekki getað æft vegna þessa undanfarna daga og á því ekki von á að ná landsleiknum í næstu viku. Ég þarf að láta meta þetta þegar landsliðið kemur saman á sunnudaginn en ég hugsa að ég missi af leiknum," sagði Brynjar í samtali við Reading Evening Post.