Dræm miðasala á leiki Englendinga

Svo gæti farið að allt að tíu þúsund sæti yrðu auð á Wembley á laugardaginn þegar Englendingar mæta Slóvökum í vináttuleik í knattspyrnu.

Um helgina gefst stuðningsmönnum enska landsliðsins tækifæri á að sjá lærisveina Fabio Capello spila á heimavelli í fyrsta skipti í hálft ár, en áhuginn á leiknum virðist frekar lítill þrátt fyrir að miðaverð hafi verið lækkað.

Þannig eru tíu þúsund miðar lausir á Slóvakíuleikinn á laugardaginn og þá á enn eftir að selja annað eins á Úkraínuleikinn í undankeppni HM í næstu viku.

Enska liðið hefur aðeins unnið sex af síðustu tíu heimaleikjum sínum og oft hefur hverið kvartað yfir því að stuðningsmenn liðsins séu óþolinmóðir og fljótir að byrja að baula á sína menn ef á móti blæs.

Miðaverð á Wembley hefur verið skorið niður að undanförnu. Ekki var óalgengt að kostaði tíu þúsund krónur á völlinn, en enska knattspyrnusambandið hefur lækkað dýrustu miðana niður fyrir sjö þúsund krónur.