Enn bætist á meiðslalista Skota

Paul Hartley verður ekki með Skotum í leikjum liðsins gegn Hollandi og Íslandi í undankeppni HM 2010.

Hartley meiddist aftan í læri á æfingu með Skotum í gær og hefur þegar haldið aftur til síns heima.

Þetta er enn eitt áfallið fyrir George Burley landsliðsþjálfara en í gær var greint frá því að þrír leikmenn hefðu dottið úr hópnum. Þetta eru þeir Dacid Weir, Kirk Broadfoot og Kris Commons. Það eru reyndar enn bundnar vonir við að sá síðastnefndi verði með í leiknum gegn Íslandi á miðvikudaginn í næstu viku.

Það eru hins vegar góðar fréttir fyrir Burley að meiðsli Barry Ferguson fyrirliða eru ekki jafn slæma og í fyrstu var óttast. Ferguson er fyrirliði Skota en enn er óvíst um þátttöku varafyrirliðans Stepen McManus sem er meiddur á ökkla.

„Ástand McManus batnar með hverjum deginum og erum við ánægðir með það," sagði Terry Butcher, aðstoðarlandsliðsþjálfari Skota. „Við þurfum að fylgjast grannt með honum áfram og meta hvort hann eigi möguleika á að ná leiknum gegn Íslandi. Hann er alla vega harðákveðinn í að yfirgefa ekki hópinn nú."

Paul Hartley kom inn á sem varamaður þegar Skotland mætti Íslandi á Laugardalsvelli í haust.