Nýr framherji við hlið Cristiano Ronaldo í kvöld

Það er mikið undir hjá portúgalska landsliðinu í kvöld því mega alls ekki tapa á móti Ungverjum ef liðið ætlar að eiga einhverja raunhæfa möguleika á að komast á HM í Suður-Afríku.

Portúgalar eru sem stendur í 4. sæti síns riðils, sjö stigum á eftir Dönum (1. sæti) og þremur stigum á eftir Ungverjum (2. sæti). Tapi Portúgalar í Ungverjalandi í kvöld verða þeir sex stigum á eftir Ungverjum þegar aðeins sex stig eru eftir pottinum.

Carlos Queiroz, þjálfari portúgalska landsliðsins, hefur samkvæmt heimildum portúgalska blaðsins A Bola ákveðið að skipta um framherja við hlið Cristiano Ronaldo. Simao Sabrosa hefur verið að spila þessa stöðu í undankeppninni til þessa en hann hefur verið færður niður á miðjuna. Þess í stað verður Liedson, framherji Sporting, við hlið Ronaldo.

Liedson kom inn á sem varamaður í hálfleik í sínum fyrsta landsleik á móti Dönum um síðustu helgi og tryggði Portúgölum stig með því að skora jöfnunarmark leiksins á 86. mínútu.

Tiago Mendes dettur út í liðinu fyrir Liedson og Simao Sabrosa tekur stöðu hans á miðjunni þar sem hann mun spila með þeim Deco og Raul Meireles (Porto).

Liedson da Silva Muniz er 31 árs gamall og fæddur í Brasilíu. Hann hefur skorað 98 mörk í 172 leikjum með Sporting Clube de Portugal frá 2003. Hann kom til Portúgals frá brasilíska liðinu Corinthians.